زانکۆی سەلاحەدین دیداری زانستیی “ڕەخنەی ئەدەبی، خولی د. کامیل بەسیر” بەڕێوەبرد
هەولێر – ٣٠ی نیسانی ٢٠٢٦
ئەمڕۆ پێنجشەممە، بە چاودێریی (پ.د. کامەران یونس حەمەدەمین) سەرۆکی زانکۆی سەلاحەدین، لە مەراسیمێکی زانستیی شایستەدا، دیداری (ڕەخنەی ئەدەبی – خولی د. کامیل بەسیر) لە سەنتەری ڕۆشنبیریی زانکۆ بەڕێوەچوو.
ئەم دیدارە بە هەوڵ و هەماهەنگیی بەشە کوردییەکانی زانکۆی سەلاحەدین لە هەرسێ کۆلیژی (پەروەردەی شەقڵاوە، پەروەردەی مەخمور، و پەروەردەی بنەڕەتی) بە هاوبەشی لەگەڵ (دامەزراوەی کەریمی عەلەکە) سازکرا.
بەشداربووان و ئامادەبووان
لە دیدارەکەدا، (پ.د. شەریف مەولود) یاریدەدەری سەرۆکی زانکۆ بۆ کاروباری زانستی، نوێنەرایەتی سەرۆکایەتی زانکۆی کرد. هەروەها ڕاگرانی هەرسێ کۆلیژی بەشدار:
• (پ.د. چەتۆ حەمەدەمین) ڕاگری کۆلیژی پەروەردەی شەقڵاوە.
• (پ.ی.د. نادیە تەلعەت) ڕاگری کۆلیژی پەروەردە/ مەخمور.
• (پ.ی.د. مزگین چالی) ڕاگری کۆلیژی پەروەردەی بنەڕەتی.
لەگەڵ ژمارەیەکی بەرچاو لە سەرۆکبەشەکان، مامۆستایان، پسپۆڕانی بواری ئەدەب و توێژەران ئامادەی مەراسیمەکە بوون.
کارنامەی دیدارەکە
دیدارەکە تیشکی خستە سەر پرسی ڕەخنەی ئەدەبی و پێگەی زانستیی (د. کامیل بەسیر). کارنامەی دیدارەکە بریتی بوو لە:
• پێشکەشکردنی ١٠ توێژینەوەی زانستی و ئەکادیمی.
• دابەشکردنی توێژینەوەکان بەسەر سێ پانێڵی جیاوازدا کە تێیاندا گفتوگۆی چڕ دەربارەی مێژوو و گۆڕانکارییەکانی ڕەخنەی ئەدەبی کوردی کرا.
ئەم دیدارە وەک هەنگاوێکی گرنگ لە زنجیرە چالاکییە زانستییەکانی زانکۆی سەلاحەدین دادەنرێت بۆ بەرزڕاگرتنی ناوی زانایانی کورد و دەوڵەمەندکردنی کتێبخانەی ئەکادیمی بە توێژینەوەی نوێ لە بواری زمان و ئەدەبی کوردیدا.
لە کۆتایی هەر پانێڵکدا سوپاس و پێزانین پێشکەشی پانێڵیست و بەڕێوەبەرانی پانێڵەکان کرا.
#ڕاگەیاندنی_کۆلێژی_پەروەردەی_شەقڵاوە
